Големи шумски пожари беснеат во делови од Канада, додека земјата се соочува со екстремни горештини предизвикани од таканаречената топлинска купола. Властите издадоа предупредувања за високи температури и опасно загаден воздух за повеќе од 100 милиони луѓе.
Во канадската покраина Онтарио е снимена драматична сцена на товарен воз што минува низ пламените јазици. На видеото, снимено од кабината на локомотивата, се гледа како огнот го опкружува возот, додека машиновозачот вели дека ситуацијата станува застрашувачка.
Густ чад од пожарите во северен Квебек и северозападен Онтарио го обоил небото над Монтреал во жолтеникава боја, иако огнените фронтови се наоѓаат стотици километри подалеку.
Метеоролозите прогнозираат дека температурата во Отава и Торонто ќе достигне до 38 степени Целзиусови, а поради високата влажност чувството ќе биде како да е уште потопло. Канадското Министерство за животна средина предупреди дека квалитетот на воздухот дополнително ќе се влошува, со сериозни ризици за здравјето на населението.
Според прогнозите, најголемиот дел од Канада би можел да почувствува мало заладување кон крајот на неделата, но топлинската купола би можела да се задржи до крајот на месецот.
Екстремните горештини се проширија и во делови од САД. Во Билингс, во сојузната држава Монтана, биле измерени 44 степени, додека во Солт Лејк Сити температурата достигнала 43 степени Целзиусови. Националната метеоролошка служба предупреди дека најсилниот топлотен бран ќе се прошири кон североисточниот дел на земјата, каде што во повеќе градови се очекуваат температури близу 38 степени.
Научниците оценуваат дека ваквите екстремни временски појави се поврзани со климатските промени. Според климатолозите, топлинските куполи се природен феномен, но поради затоплувањето на атмосферата и океаните тие стануваат сè поинтензивни и подолготрајни.
Дополнително, експертите го следат развојот на климатскиот феномен Ел Нињо во Тихиот Океан, кој, според прогнозите, би можел дополнително да ги наруши временските услови во наредните месеци и да биде еден од најсилните досега регистрирани.
