Градоначалникот на Скопје, Орце Ѓорѓиевски, по силното невреме што попладнево го зафати главниот град, соопшти дека сите надлежни градски служби веднаш биле мобилизирани и излегле на терен за расчистување на последиците.
Тој посочи дека, иако природните непогоди не можат да се спречат, институциите реагирале брзо, организирано и навремено.
„Скопје денес го зафати силно невреме со бурни налети на ветер. Природата не можеме да ја спречиме, но реагиравме брзо, организирано, навремено и одговорно“, напиша Ѓорѓиевски.
Според него, екипите на градските јавни претпријатија веднаш започнале со расчистување на паднатите дрвја и гранки, а главните сообраќајници веќе се проодни.
„Екипите на градските јавни претпријатија веднаш излегоа на терен – булеварите се проодни, а паднатите дрвја и гранки интензивно се расчистуваат. Ќе бидеме будни и на терен во текот на целата ноќ. Скопје нема да остане само ниту во најтешките моменти“, порача Ѓорѓиевски.
По невремето, повеќе градски служби продолжуваат со расчистување на штетите, а надлежните институции и понатаму апелираат граѓаните да бидат внимателни и да избегнуваат движење во близина на оштетени дрвја и нестабилна инфраструктура.
