(Видео) Полиција и заштитни огради во центарот на Белград – затворени улиците околу изборната комисија

Дел од центарот на Белград е затворен за сообраќај, а трасите на јавниот превоз се изменети во близина на седиштето на Републичката изборна комисија (РИК), додека во Србија се одржуваат предвремените парламентарни избори.

Според известувањето на новинската агенција Фонет, поставени се заштитни огради на потегот од раскрсницата кај Лондон кон Теразие, а забележано е и засилено полициско присуство.

— реклама —

За сообраќај е затворен и правецот од Теразие кон улицата „Крал Милан“, додека автобусите што вообичаено сообраќаат на овој потег се пренасочени по други улици.

— реклама —

Возач на автобусот со број 31 им соопштил на патниците дека надлежните служби го известиле оти поради изборите мора да вози по изменета траса.

Седиштето на Републичката изборна комисија се наоѓа на улицата „Крал Милан“ број 14, токму на делницата меѓу Теразие и Лондон, каде што се поставени оградите.

— реклама —

Во меѓувреме, претседателот на РИК, Владимир Димитријевиќ, соопшти дека избирачките места во Србија главно биле отворени навреме, во 7 часот, но дека на одредени локации имало помали доцнења поради големиот интерес на гласачите и подготовките на избирачките одбори.

„Затоа би ги замолил гласачите и членовите на избирачките одбори за малку разбирање и трпение“, изјави Димитријевиќ на првата редовна прес-конференција на РИК.

Тој ги повика членовите на избирачките одбори да одржуваат ред во текот на целиот изборен ден и да постапуваат согласно законските прописи и упатствата на Комисијата.

На денешните избори право на глас имаат 6.451.292 граѓани, кои можат да гласаат на 8.392 избирачки места. На гласачкото ливче се наоѓаат 18 изборни листи, а избирачките места ќе бидат отворени до 20 часот.