Силна буична поплава го погоди хималајскиот регион на Непал, во близина на границата со Тибет, при што надојдената вода уништи делови од населени места и предизвика сериозни оштетувања на патишта, мостови и енергетска инфраструктура.
Најтешко погодени се областите Сјапру Беси и Тимуре во планинскиот округ Расува, каде што живеат околу 50.000 луѓе. Властите ги повикаа жителите што живеат долж реката Бхоте Коши веднаш да се преместат на повисоките и побезбедни места.
„Добивме извештаи за уништени села и градилишта на инфраструктурни проекти“, изјави управителот на округот, Нарендра Паријар, додавајќи дека постои можност бројот на жртвите да биде голем, но дека во овој момент нема потврдени информации.
Непалското Министерство за водни ресурси соопшти дека меѓу оштетените објекти има хидроцентрали, патишта и мостови. Поради оштетувањата, во делови од погодениот регион е прекинато снабдувањето со електрична енергија.
Премиерот Балендра Шах потврди дека на терен се испратени спасувачки екипи, полиција и припадници на армијата. Властите им наложиле на жителите од пониските подрачја да се евакуираат, додека населението покрај реката е повикано на особена претпазливост.
Причината за најновата поплава засега не е утврдена. Сепак, властите потсетуваат дека минатогодишната смртоносна поплава на истата река била предизвикана од излевање на глацијално езеро.
Реката Бхоте Коши извира на Тибет, а на територијата на Непал се влева во реката Тришули, која понатаму продолжува кон Индија како реката Гандак.
Во поплавата на Бхоте Коши во 2025 година загинаа девет лица, додека 24 и натаму се водат како исчезнати. Тогаш беше уништен и Мостот на пријателството, кој ги поврзува Непал и Кина, поради што со месеци беа отежнати трговијата и сообраќајот.
Регионалната агенција за следење на климатските услови тогаш соопшти дека катастрофата била предизвикана од излевање на супраглацијално езеро на Тибет.
