(Видео) Поповиќ: „ММФ ги разби лагите на Мицкоски за „третата“ економија – македонската економија расте побавно дури и од Косово“

На денешната прес-конференција членката на Извршниот одбор на СДСМ, Наташа Поповиќ, изјави дека најновите проекции на Меѓународниот монетарен фонд (ММФ) покажуваат дека македонската економија во следните пет години ќе расте побавно од повеќето земји во регионот, оценувајќи дека тоа ги демантира, како што рече, тврдењата на премиерот Христијан Мицкоски за економските резултати на државата.

— реклама —

Поповиќ посочи дека ММФ прогнозира просечен економски раст од три проценти за Македонија во наредниот петгодишен период, додека повисок раст се очекува во Албанија, Србија, Молдавија, Украина и Косово.

Според неа, овие податоци ја покажуваат реалната состојба во економијата, а граѓаните веќе ги чувствуваат последиците преку намалениот животен стандард и зголемените трошоци за живот.

— реклама —

Таа ја обвини Владата дека не ги исполнила ветувањата за економски развој, инвестициски циклус и подобар животен стандард. Како аргумент ги наведе, како што рече, падот на странските директни инвестиции за 61 процент во 2025 година, намалувањето на индустриското производство за два проценти во мај и падот на бројот на вработени во индустријата за 2,6 проценти во споредба со истиот период лани.

— реклама —

Поповиќ оцени дека состојбата е загрижувачка и во јавните финансии. Според неа, буџетскиот дефицит е веќе исцрпен на половина од годината, јавниот долг се приближува до 11 милијарди евра, а за две години државата се задолжила за околу 2,5 милијарди евра.

Во обраќањето таа наведе дека ребалансот на Буџетот претставува признание за, како што рече, промашените економски политики, бидејќи се намалуваат средства за поддршка на компаниите, младите и социјално ранливите категории, додека не се кратат трошоците за луксузот на власта.

— реклама —

Поповиќ додаде дека со проектираната инфлација од 4,5 проценти граѓаните ќе се соочат со дополнително поскапување на животот и предупреди дека, доколку продолжи сегашното темпо на задолжување, јавниот долг до крајот на годината би можел да надмине 61,5 проценти од бруто-домашниот производ.