На денешната прес-конференција членка на Извршниот одбор на СДСМ, Наташа Поповиќ обвини дека власта предводена од ВМРО-ДПМНЕ, преку јавни настапи и објави на нејзини функционери, шири говор на омраза и поттикнува поделби меѓу граѓаните.
Поповиќ вели дека, по изјавите на премиерот Христијан Мицкоски, со навредлив речник продолжил и министерот Иван Стоилковиќ, за кого тврдат дека на социјалните мрежи споделува содржини со навредливи квалификации кон политичките неистомисленици.
Таа оценува дека ваквиот јавен дискурс создава атмосфера на нетрпеливост и посочува дека наместо национално обединување, власта користи реторика што, според нив, поттикнува омраза.
Поповиќ тврди и дека ваквиот говор придонесува за зголемување на тензиите во општеството, повикувајќи на одговорност и промена на политичката комуникација.
Од СДСМ порачуваат дека Македонија заслужува политичка култура заснована на почит, дијалог и аргументи, наместо навреди и поделби.
