(Видео) Поповиќ: СДСМ бара одговорност од Клековски - 5 дена се криела вистината за труењето во Гостивар, институциите дозволија епидемијата да ескалира

На прес-конференција, членката на Извршниот одбор на СДСМ, Наташа Поповиќ, денеска обвини дека институциите задоцниле со реакцијата во случајот со труењето на граѓаните во Гостивар и побара политичка и институционална одговорност од министерот за здравство Сашо Клековски и од останатите надлежни.

— реклама —

Поповиќ изјави дека, според партијата, состојбата со труењето на граѓаните е алармантна и дека повеќе од 2.000 лица побарале лекарска помош поради симптоми поврзани со загадена вода за пиење.

Поповиќ тврдеше дека епидемијата на гастроентеритис не избувнала одеднаш, туку се развивала со денови, додека надлежните институции, како што рече, не реагирале навреме. Според неа, уште во раната фаза постоеле сознанија и сериозни сомнежи дека водата не е безбедна, како и дека бројот на заболени невообичаено расте.

— реклама —

Таа изјави дека при надзор било утврдено оти на главниот цевковод била поставена дивоградена пумпа без одобрение, преку која, како што наведе, директно се вбризгувала вода од реката Вардар во водоводниот систем.

— реклама —

СДСМ тврди дека, и покрај овие сознанија, епидемијата била прогласена дури кога здравствените установи биле преполни со пациенти. Поповиќ го обвини министерот Клековски дека пет дена не ја информирал јавноста за, како што рече, масовното труење во Гостивар, со што, според неа, било одложено прогласувањето на епидемија.

Од партијата оценија дека прогласувањето на епидемија не е административна формалност, туку предуслов за активирање на мерки за заштита на јавното здравје, вклучително и засилена координација меѓу институциите, епидемиолошка истрага и дополнителни превентивни активности.

СДСМ побара целосно расветлување на случајот и одговор на прашањата зошто, според нив, информациите не биле навреме соопштени на јавноста, зошто не биле преземени итни мерки и кој ќе сноси одговорност за настанатата состојба.