(Видео) Повеќе од 120.000 луѓе во Австралија без струја поради силно невреме: Една жена загина

Повеќе од 120.000 луѓе останаа без електрична енергија во јужна Австралија поради силните ветрови и дождови, соопштија денеска властите.

Жена (63) загинала кога дрво паднало врз колибата во која се наоѓала.

— реклама —

Во сојузните држави Викторија и Тасманија е причинета голема материјална штета, јавува Ројтерс.

„Ова е тажен и трагичен настан за семејството на жртвата и моите мисли и сочувство изразувам до нејзиното семејство и службите за итни случаи кои реагираа на овој инцидент“, рече викторијанската премиерка Џасинта Алан на прес-конференција.

— реклама —

Државната служба за итни случаи на Викторија примила повеќе од 2.800 повици во текот на ноќта, главно поради соборени дрвја и материјална штета.

На југоисточното крајбрежје дуваат ветришта со брзина од 150 километри на час, па остануваат на сила предупредувањата за тоа подрачје.

— реклама —

Властите на државата Викторија денеска ги советуваа луѓето да избегнуваат крајбрежни области поради бранови, области под карпи поради нестабилно тло и ниски области поради поплави.

Најмалку 121.000 луѓе и денеска се без струја, но, според Аланова, тоа е помалку од 180.000 луѓе кои останаа без струја во раните утрински часови.