(Видео) Повредено 21 лице во протестите во Тирана, Рама предупреди: Оние што уништуваат имот ќе сносат одговорност

Жестоки судири меѓу демонстрантите и полицијата ја одбележаа петтата вечер од студентските протести во Тирана. Полицијата употреби солзавец, гумени куршуми и водени топови за да ја стави ситуацијата под контрола, додека демонстрантите фрлаа камења и други тврди предмети кон полициските службеници и зградата на Министерството за образование.

Според полициското соопштение, во претходните инциденти биле повредени осум полицајци, а била причинета материјална штета на зградата на министерството и на сообраќајната сигнализација.

— реклама —

Во Универзитетската болница за трауматологија медицинска помош побарале 21 лице, меѓу кои осум полицајци, 10 демонстранти и тројца случајни минувачи. Директорот на полицијата во Тирана, Олигер Торба, исто така се појавил во болницата со завиена рака, откако бил повреден за време на протестите. Околу зградата на премиерот биле распоредени припадници на специјалната единица РЕНЕА.

— реклама —

Полицијата соопшти дека по инцидентите во петокот биле уапсени 10 лица, а постапки биле поведени против уште 22 лица.

Албанскиот премиер Еди Рама ги посетил местата на кои била причинета штета, меѓу кои и оштетен деловен објект. Тој најавил помош за оштетените компании и ги повикал сопствениците да поднесат барања преку платформата на порталот е-Албанија.

— реклама —

Рама нагласил дека го поддржува правото на студентите и граѓаните на протест, но предупредил дека сите што уништуваат имот и деловни објекти ќе сносат одговорност.

Во меѓувреме, Агенцијата за надзор на полицијата соопшти дека го следи постапувањето на полициските службеници за време на протестите. Се собираат и анализираат снимки од медиумите и материјали објавени на социјалните мрежи за да се утврдат околностите на евентуалните прекршувања на законот и одговорноста за нив.