Големиот шумски пожар во регионот Жиронд, во близина на Бордо, во текот на ноќта не се проширил, соопштија утрово локалните власти, оценувајќи дека ситуацијата засега е стабилизирана.
Според регионалната управа, во текот на ноќта биле регистрирани неколку повторни жаришта, главно северно од Ле Порж и Кап Фере, но сите биле ставени под контрола. Властите додаваат дека изгорената површина не е зголемена.
Сепак, опасноста од повторно разгорување на пожарот останува. Француската метеоролошка служба „Метео Франс“ за денеска прогнозира температури меѓу 33 и 35 Целзиусови степени во внатрешноста на земјата, како и југоисточен ветер и морски поветарец долж брегот, услови што би можеле повторно да го разгорат огнот.
Портпаролот на Националната федерација на пожарникари, потполковник Ерик Брокарди, изјави дека пожарот во Жиронд, кој го опиша како „огромен ѕвер“, се наоѓа на пресвртна точка.
Тој нагласи дека состојбата на теренот и понатаму е кревка и нестабилна, но изрази уверување дека досегашните напори на пожарникарите ќе дадат резултат.
„Храброста и пожртвуваноста на пожарникарите ќе направат целиот досегашен труд да не биде залуден. Ќе победиме“, порача Брокарди.
