(Видео) Пожарите не стивнуваат во Хрватска: Ново жариште избувна над Трогир

Хрватска повторно се соочува со сериозни пожари, а ново огнено жариште избувна на подрачјето на Тролокве, над Трогир. Снимки од пожарот беа објавени и на страницата на хрватските пожарникари.

Информацијата ја потврдил главниот пожарникарски командир, Славко Туцаковиќ, по што еден „ер трактор“ бил пренасочен од подрачјето на Омиш кон Трогир за да помогне во гаснењето.

— реклама —

Во меѓувреме, состојбата кај Локва Рогозница е нешто поповолна и засега нема ширење на огнот. Активен е и пожарот кај Куна Пелешка на Пељешац, каде што силниот ветер дополнително им ја отежнува работата на пожарникарите. Засега објектите се одбранети и нема потреба од евакуација, соопшти Хрватската противпожарна заедница.

Најтешка останува ситуацијата во областа на Омиш, каде што огромниот пожар во текот на ноќта стигна до градот и предизвика сериозни штети. Според досегашните информации, медицинска помош побарале 36 лица, а 14 биле задржани во болница, од кои 10 се на интензивна нега.

— реклама —

Размерите на пожарот се толку големи што бил регистриран и на сателитски снимки на НАСА.

— реклама —

Пожарот на Пељешац исто така продолжува да беснее, поради што загрозеното население и туристите биле евакуирани. Во пожарите се уништени куќи, автомобили и угостителски објекти, а во хаосот дел од луѓето се обидувале да избегаат со возила што веќе биле зафатени од пламенот, додека други спасот го барале во морето.

Сите расположливи сили се на терен, но силниот ветер и непристапниот терен дополнително ја отежнуваат борбата со огнената стихија.