(Видео) Престрелка на техно-фестивал во Швајцарија: Повеќе повредени, полицијата трага по сторителот, интервенираше и воен хеликоптер

Повеќе лица се повредени во престрелка што рано утрово се случила за време на техно-фестивал во швајцарскиот град Арау. Полицијата сè уште утврдува што точно се случило, а засега не е познато дали има загинати, ниту кој пукал.

Пукотниците биле испукани околу 3 часот наутро на просторот на хиподромот Шахен, каде што се одржувал фестивалот „Арау Рејв“.

— реклама —

Полицијата соопштила дека во инцидентот има „повеќе жртви“, но засега не е прецизирано дали под овој термин се подразбираат и загинати лица, пренесува швајцарскиот весник „Блик“.

„Сè уште не е јасно што точно се случило“, изјавила портпаролката на кантоналната полиција на Аргау, Ванеса Румполд.

— реклама —

Таа потврдила дека биле испукани повеќе куршуми кон поголема група луѓе.

На местото на инцидентот има голем број полицајци, а поширокото подрачје околу хиподромот е опколено. На терен се и пожарникари, како и специјализирана мобилна единица на цивилната заштита на кантонот Аргау.

Швајцарскиот јавен сервис СРФ објави дека во интервенцијата бил вклучен и хеликоптер „Супер Пума“ на швајцарската армија.

— реклама —

Засега не е познато кој пукал, ниту дали осомничениот или осомничените се во бегство.

На хиподромот во текот на викендот се одржувал фестивалот „Арау Рејв“, на кој настапувале голем број уметници и диџеи од целиот свет.

Според организаторите, фестивалот бил посетен од околу 3.500 луѓе. Манифестацијата била опишана како настан на уникатна локација, со амбиент на хиподром и најголемата тркачка патека во Швајцарија.