Со пригодна свеченост во Античкиот театар во Охрид, претседателката Гордана Сиљановска-Давкова вчера официјално го прогласи за отворено 66. издание на фестивалот „Охридско лето“.
Во своето обраќање, таа истакна дека човештвото живее во време исполнето со поделби, конфликти, војни, страв и неизвесност, но дека токму културата и уметноста остануваат простор каде се создаваат надежта, мирот и солидарноста.
„За разлика од политиката, која е далеку од уметноста на можното, музиката и театарот, односно културата, остануваат креатори на невозможното“, порача претседателката.
Сиљановска-Давкова нагласи дека творештвото со векови ја осветлува човековата свест и совест и оцени дека фестивалот „Охридско лето“ е симбол на поетиката на мирот и љубовта, потврдувајќи дека уметноста е суштинска човечка потреба.
Таа истакна дека Охрид со право ја носи титулата македонска културна метропола и дека претставува идеално место за фестивал од ваков ранг.
„Дозволете ми со неизмерна радост и особена чест да го прогласам 66. издание на фестивалот „Охридско лето“ за отворено“, рече претседателката.
По свеченото отворање, таа порача дека во наредните 40 фестивалски вечери Охрид нема да биде само град, туку сцена на која уметноста ќе го има главниот збор.
