(Видео) Приврзаници на СНС запалија бакљи, потоа пламна Нишката тврдина

Пожар избувна вечерва на Нишката тврдина по огномет на предизборен собир на Српската напредна странка (СНС). Гореле сува трева и ниска вегетација на бедемите, а пожарот бил брзо изгаснат.

На снимките објавени на социјалните мрежи се гледаат запалени бакљи на ѕидините на тврдината, а потоа и оган на бедемите.

— реклама —

„Јужне вести“ објавија дека приврзаниците на СНС, по прошетката низ центарот на Ниш, запалиле бакљи, по што избувнал пожар. По гаснењето останале видливи црни траги, а на местото била присутна и полицијата.

N1, пак, објави дека пожарникарите во првиот телефонски разговор потврдиле дека гореле трева и ниска вегетација и дека пожарот бил брзо изгаснат. Кога повторно биле контактирани со прашање дали пожарот е поврзан со бакљадата, не сакале да дадат дополнителни информации.

— реклама —

Инцидентот се случил по предизборниот собир за поддршка на листата „Александар Вучиќ – Обединета Србија“. Претходно, членовите и приврзаниците на СНС организирале прошетка низ централните улици на Ниш, која завршила кај тврдината.

— реклама —

Собирот бил организиран на повик на нишкиот градоначалник и функционер на СНС, Драгослав Павловиќ, кој порачал дека од Ниш сакаат да испратат „порака на мир, стабилност и единство“. Тој ги повикал граѓаните на претстојните избори да гласаат за листата „Александар Вучиќ – Обединета Србија“.

По неговото обраќање следувале огномет и бакљада на ѕидините, а потоа се појавил пожарот.

— реклама —

Полицијата до објавувањето на информациите немала соопштено детали за околностите под кои избувнал пожарот, ниту дали некој е приведен.

Локалната „Ниш ТВ“, која известувала од собирот, завршницата ја опишала како „спектакуларен огномет“, но во извештајот не го споменала пожарот.