Пред најавената посета на претседателката на Европската комисија, Урсула фон дер Лајен, група Албанци протестирала на аеродромот во Приштина поради пресудите на Специјализираните совети во Хаг за поранешните лидери на УЧК.
Демонстрантите го блокирале главниот излез од аеродромот, каде што се очекувало да помине фон дер Лајен. Таа, сепак, го напуштила аеродромот преку излезот кон Липљан, пренесува „Коха“.
Протестот бил проследен со транспаренти во знак на поддршка на Хашим Тачи, Јакуп Красниќи, Кадри Весели и Реџеп Селими, кои Специјализираните совети во Хаг ги осудија на вкупно 81 година затвор за воени злосторства.
На транспарентите биле испишани пораки како „Не во мое име“, „ЕУ нè предаде“ и „Денес Тачи, утре Зеленски“.
Фон дер Лајен во Приштина се сретнала со в. д. претседателката на привремените институции, Албулена Хаџиу, а најавена е и средба со премиерот на привремените институции, Албин Курти.
Претседателката на Европската комисија во Приштина пристигнала од Тирана, каде што се сретнала со претседателот Бајрам Бегај и премиерот Еди Рама.
