(Видео) Предупредувала дека ѝ е загрозен животот, но никој не реагирал: Убиство на жена ја крена Приштина на нозе

Илјадници луѓе се собраа на протест во главниот град Приштина, организиран по убиството на Арлинда Зекај (49), која во неделата била убиена од својот девер во близина на западниот град Пеќ. Активистите наведуваат дека Зекај е осмата жртва на смртоносно семејно насилство оваа година на Косово, пренесува Асошиејтед прес.

„Зарем мора да умреме за да нè сфатат сериозно?“, пишувало на еден од транспарентите што демонстрантите ги носеле за време на маршот. На другите пораки, испишани со црвена боја, стоело: „Мажите убиваат жени, државата молчи“ и „Долу патријархалниот систем“.

Демонстрантите носеле и фотографии од убиените жени. Косово донело неколку закони и прописи за сузбивање на насилството врз жените, вклучително и доживотни затворски казни за убијците, но активистите предупредуваат дека тие не се спроведуваат доследно и дека нема координација меѓу надлежните институции. Тоа се однесува на полицијата, социјалните служби, обвинителствата и судовите.

— реклама —

Смртта на Арлинда Зекај, која имала двојно американско и косовско државјанство, предизвика дополнителен гнев во јавноста, бидејќи пред убиството таа им се обратила на властите барајќи помош и предупредувајќи дека би можела да биде убиена.

Во писмото до кабинетот на главниот обвинител, испратено само три дена пред смртта, Зекај напишала дека службените лица „си ја префрлаат одговорноста едни на други“, со што дозволуваат „опасноста по мојот живот да продолжи“.

— реклама —

Зекај повеќепати се жалела на насилството од нејзиниот сопруг, по што се иселила и почнала да живее со родителите, истовремено барајќи заштита.

Таа се вратила дома откако нејзиниот сопруг претходниот викенд бил приведен поради семејно насилство. Според изјава на еден член на семејството, полицијата не ѝ обезбедила придружба, а деверот ја убил со секира по нејзиното враќање.

Потоа избегал од местото на злосторството, а бил уапсен по неколкудневно бегство.

— реклама —

„Овој случај отвора сериозни прашања за можни пропусти во синџирот на институции“, соопшти Мрежата на жени на Косово, една од организаторките на протестот. Организацијата додаде дека сите институции мора да дејствуваат координирано кога една жена ќе побара помош.

Косовскиот парламент во понеделникот одржа вонредна седница поради смртта на Арлинда Зекај. Пратениците формираа истражна комисија која ќе ја испита можната одговорност на институциите во овој случај.

На критиките им се придружи и премиерот Албин Курти, кој за случајот го обвини „системскиот синџир на пропусти на институциите одговорни за безбедноста и правосудството“.

„Убиство на кое му претходеле такви предупредувања, на кои никој не реагирал, тешко дека можело да заврши поинаку. Поради тоа, ситуацијата е уште понеопростлива“, изјави тој на денешната седница на владата.

Според податоците на Министерството за правда, полицијата на Косово, во текот на 2025 година примила 2.815 пријави за семејно насилство.

Од воведувањето на оваа казна во 2012 година, тројца мажи биле осудени на доживотен затвор за убиство на своите партнерки.