(Видео) 12 повредени на протестите во Приштина, демонстрантите фрлаа факели и петарди, полицијата употреби солзавец

Незадоволството по пресудите на Специјализираните совети на Косово продолжи со нов протест во Приштина, каде што стотици граѓани побараа ограничување на овластувањата на судот со седиште во Хаг.

Демонстрантите се собраа во близина на косовските институции и побараа парламентот да го усвои законското решение предложено од опозициската Демократска партија на Косово (ПДК). Предлогот предвидува промени во начинот на функционирање на Специјализираните совети, вклучително и ограничување на максималните затворски казни на 15 години, можност за жалба до Врховниот суд и издржување на казните на Косово.

— реклама —

Протестот во еден момент прерасна во тензии меѓу демонстрантите и полицијата. Дел од присутните фрлале факели и петарди, по што полицијата употребила солзавец за да ја растера толпата.

Меѓу демонстрантите се вееле албански знамиња и знамиња на УЧК, а биле носени и транспаренти со пораки со кои се бара усвојување на предложениот закон.

— реклама —

Според Насер Сила, раководител на одделот за итна помош во една од централните болници во Приштина, во протестите биле повредени 12 лица – 11 цивили и еден полицаец. Сите биле згрижени во болница и потоа пуштени.

— реклама —

Протестите следуваат по пресудите против поранешниот претседател на Косово, Хашим Тачи, и тројца други поранешни команданти на УЧК, кои беа осудени за воени злосторства извршени за време на војната во Косово од 1998 до 1999 година. Тие добија затворски казни во траење од 13 до 25 години.

На крајот на септември, косовскиот парламент едногласно ги осуди пресудите преку посебна декларација. Оттогаш, повеќе од 20 дена во земјата се одржуваат секојдневни мирни протести.

— реклама —

ПДК бара дополнително ограничување на мандатот и овластувањата на Специјализираните совети. Поддржувачите на УЧК сметаат дека пресудите се неправедни и стравуваат дека тие би можеле да влијаат врз перцепцијата за борбата на УЧК за независност на Косово.