(Видео) Редици до недоглед: Србите масовно чекаат за гласање во Чикаго, Лос Анџелес, Париз и Љубљана

Долги редици од гласачи се формираа пред избирачките места во повеќе градови низ светот, каде што српските државјани што живеат во странство денеска го остваруваат своето избирачко право на предвремените парламентарни избори во Србија.

Според снимките што ги објавуваат српските медиуми, голем број граѓани чекаат за гласање во Чикаго, Вашингтон, Лос Анџелес, Париз и Љубљана. На одредени локации редиците се толку долги што гласачите очекуваат повеќечасовно чекање.

— реклама —

Во Санта Моника, во близина на Лос Анџелес, гласачите се организирале и заедно пристигнале на избирачкото место. Ѓорѓе Стијеповиќ, кој се јавил за телевизијата Н1, изјавил дека никогаш претходно не видел толку голем број луѓе на гласање.

„Мислам дека овојпат сè беше поинаку од она што досега сум го доживеал. Се собравме во српско кафуле во Санта Моника, а потоа во колона дојдовме до центарот за гласање. Ова овде изгледа фасцинантно“, изјавил Стијеповиќ.

— реклама —

Според него, на гласање пристигнале српски државјани од различни делови на западниот дел на САД, вклучувајќи ги Калифорнија, Тексас и Аризона.

„Станува збор за стотици луѓе, а ќе бидат потребни часови за да се дојде на ред. Овде никогаш не сум видел толку многу луѓе. Мислам дека ќе се чека до раните утрински часови“, додал тој.

— реклама —

Голем интерес за гласање е забележан и во Париз, каде што граѓаните чекаат пред избирачкото место и покрај дождливото време. Снимките доставени до порталот „Нова.рс“ покажуваат редици од гласачи и во главниот град на Франција.

Слични сцени се забележани и во Љубљана, каде што српските државјани што живеат и работат во Словенија чекаат да го остварат своето избирачко право.

За гласање во странство се пријавени вкупно 102.147 избирачи, распоредени на 93 избирачки места.

Најголем број регистрирани гласачи има во Германија, каде што се пријавени 20.107 српски државјани, и во Босна и Херцеговина, со 19.800 регистрирани избирачи. Следуваат Австрија, САД, Италија и Швајцарија.

Фотографиите и видеоснимките од повеќе светски градови покажуваат значителен интерес на одредени избирачки места, но конечната излезност на српските државјани во странство ќе биде позната по завршувањето на гласањето.