(Видео) Редици пред избирачките места во Србија, граѓаните од рано утрово чекаат да гласаат

Големи редици од граѓани се формираа пред дел од избирачките места во Србија уште во раните утрински часови, по отворањето на гласањето за предвремените парламентарни избори. Фотографиите што се споделуваат покажуваат граѓани кои чекаат да го остварат своето избирачко право, а редици биле забележани и во одредени делови од Белград.

Избирачките места се отворени во 7 часот утрово, а гласањето ќе трае до 20 часот, кога започнува пребројувањето на гласовите.

— реклама —

Според објавените изборни податоци, право на глас имаат 6.451.292 граѓани, кои можат да гласаат на вкупно 8.392 избирачки места.

View this post on Instagram

— реклама —

На изборите учествуваат 18 изборни листи со 2.418 кандидати, кои се натпреваруваат за 250 пратенички места во Народното собрание.

— реклама —

Гласање е организирано и за српските државјани кои живеат во странство, за кои се определени 93 избирачки места.

Граѓаните можат да гласаат со важечка лична карта или пасош, исклучиво на избирачкото место на кое се запишани во избирачкиот список.

Предвремените парламентарни избори се одржуваат во услови на силна политичка поларизација, по речиси две години студентски протести и барања за политичка одговорност. Главната изборна битка се води меѓу блокот на Александар Вучиќ и студентското движење, кое прерасна во значаен политички предизвик за власта.

Иако фотографиите покажуваат голем интерес на одредени избирачки места, од нив засега не може да се утврди вкупната излезност на ниво на државата. Првите официјални податоци за одѕивот се очекуваат во текот на денот, а првичните изборни резултати по затворањето на гласачките места.