(Видео) Реџепи: Со сѐ поголем одлив на студенти надвор од Македонија, пратениците од ДПМНЕ ги одбија предлозите на Левица за подобрување на студентскиот стандард

Предлог-измените на Законот за субвенциониран оброк на студентите, со кои Левица бара зголемување и проширување на студентската поддршка, не добија поддршка од пратениците од ДПМНЕ, соопшти партијата.

На собраниска седница, пратеникот и потпретседател на Левица, Реџеп Исмаил – Хактан, го образложи предлог-законот, со кој се предлага субвенцијата за студентски оброк да се утврдува во висина од 1 отсто од минималната нето-плата. Според Левица, тоа би значело субвенција од околу 260 денари.

— реклама —

Исмаил посочи дека актуелниот доходовен цензус ги исклучува и студентите кои работат за да можат да го финансираат своето образование.

„Тоа што студентот работи не значи дека нему не му треба дополнителна субвенција за да може барем да има помош во исхраната. Тие работат поради тоа што не можат да си дозволат со сопствениот социјален статус да студираат“, рече Исмаил.

— реклама —

Со предлог-измените се бара и укинување на доходовниот цензус, проширување на правото на субвенциониран оброк за вонредните студенти, како и можност оброкот да се користи секој ден, вклучително и во недела и за време на празници.

— реклама —

Левица предлага и воведување јасни нутритивни стандарди за студентските оброци, со кои би се определиле нивниот квалитет, количина и хранлива вредност.

„Ограничувањето да не може да се користи субвенционираниот оброк во недела и за време на празници е навистина голем апсурд. Студентите и во недела јадат, и за време на празници јадат, престојуваат во студентските домови, одат во библиотеките и читалните на факултетите, работат, учат, се спремаат за испитите и за обврските кои што им следуваат на факултетите“, истакна Исмаил.

— реклама —

Од Левица посочуваат дека со предложените измени целта била студентскиот оброк да стане посуштинска поддршка за студентскиот стандард, со достапна, квалитетна и нутритивно соодветна исхрана.