(Видео) Рибари во Грција пронашле морски дрон со 100 килограми експлозив

Морски дрон опремен со околу 100 килограми експлозив, кој рибари го пронашле во близина на грчкиот остров Лефкада, е неутрализиран во контролирана експлозија, објави грчката радиотелевизија ЕРТ њуз.

Дронот, долг околу шест метри, бил забележан во четвртокот покрај карпест брег на Јонското Море, а неговиот мотор сè уште работел кога рибарите го извлекле и го однеле во мало пристаниште, без да знаат дека носи експлозив.

— реклама —

Според грчката крајбрежна служба, експлозивот бил безбедно детониран, а дронот бил пренесен во специјален поморски објект каде што се истражуваат неговото потекло, техничките способности и рутата по која се движел.

— реклама —

Грчките медиуми јавуваат дека станува збор за дрон „Магура“ од украинско производство, каков што Украина користи во војната со Русија за напади врз поморски цели.

— реклама —

Министерот за цивилна заштита, Михалис Хрисохоидис, изјавил дека станува збор за „сериозен случај“, додека весникот „Катимерини“ објави дека властите ја испитуваат можната поврзаност со украинските операции против руската „флота во сенка“.

Сведоци изјавиле дека моторот на дронот продолжил да работи и по пристигнувањето до брегот, што отвора сомнежи дека операторите изгубиле контрола врз него и дека пловел сè додека не удрил во брегот.

Грчките власти изразиле загриженост што пловило натоварено со експлозив успеало да стигне до туристички остров, предупредувајќи на ризиците за поморската безбедност, инфраструктурата и населението.