(Видео) Русија постави систем „Панцир“ над прометна сообраќајница во Москва

Русија распоредила противвоздушен систем „Панцир“ над една од најпрометните сообраќајници во Москва, во близина на рафинеријата за нафта Капотња, која неодамна беше погодена во голем украински напад со беспилотни летала.

На снимките што се појавија на социјалните мрежи се гледа системот „Панцир“ поставен на надвозник, над сообраќајницата по која минуваат автомобили.

— реклама —

Системот е распореден во непосредна близина на значаен енергетски објект, кој претрпел сериозни оштетувања во нападот на 20 септември. Станува збор за московската рафинерија со која управува „Газпром њефт“.

„Ројтерс“, повикувајќи се на три извори од индустријата, објави дека по нападот во рафинеријата целосно била прекината преработката на сурова нафта. Пожари избиле во двете главни единици за примарна преработка, а според проценките на изворите, поправките и повторното започнување на производството би можеле да траат неколку недели.

— реклама —

Градоначалникот на Москва, Сергеј Собјанин, претходно потврдил дека за време на нападот со беспилотни летала бил оштетен индустриски објект во областа на рафинеријата.

Украинската безбедносна служба ја презела одговорноста за нападот, наведувајќи дека во него учествувале повеќе единици.

Рафинеријата е меѓу значајните руски капацитети за преработка на нафта. Во текот на 2024 година преработила 11,6 милиони тони сурова нафта, а произвела 2,9 милиони тони бензин и 3,2 милиони тони дизел-гориво.

— реклама —

По нападот се појавија снимки од дополнително распоредена противвоздушна одбрана во близина на објектот.

„Панцир-С1“ е руски мобилен систем за противвоздушна одбрана со краток дострел, наменет за заштита на важни воени и инфраструктурни објекти од воздушни закани, меѓу кои и беспилотни летала.

Системот комбинира противвоздушни ракети и два автоматски топа со калибар од 30 милиметри. Поставен е на камионска шасија, што овозможува релативно брзо преместување на места каде што е потребна дополнителна заштита.