Најмалку три лица загинаа, а повеќе од 20 се повредени во нови руски напади врз повеќе украински региони во текот на ноќта, соопштија локалните власти. Меѓу погодените се и станбени населби, а меѓу повредените има и петмесечно бебе.
Во Запорожје, жена и маж загинале при напад со дрон врз станбено подрачје, додека најмалку уште едно лице е повредено.
Тешки последици има и во Одеса, на брегот на Црното Море, каде локалната воена управа соопшти дека се повредени најмалку 17 лица. Меѓу нив е и петмесечно бебе.
Фотографиите објавени од украинските власти покажуваат оштетувања на повеќекатна станбена зграда.
Напади биле регистрирани и во други делови од земјата. Гувернерот на Дњепропетровската област, Олександр Ханжа, соопшти дека едно лице загинало при напад врз фабрика во Криви Рих, а уште две лица биле повредени.
Во Харковската област е повредена жена откако руски ФПВ-дрон погодил балкон на вториот кат од петкатна станбена зграда во населбата Стари Салтив, по што избувнал пожар.
Руското Министерство за одбрана потврди дека биле извршени напади, но тврди дека целите биле објекти поврзани со украинските воени капацитети.
Според Москва, во Запорожје и Криви Рих биле гаѓани компании од металната индустрија за кои руската страна тврди дека произведувале производи за воени потреби.
Во Одеската област, според руското Министерство, цели биле пристанишната инфраструктура и важен објект од транспортната инфраструктура кој, како што тврди Москва, се користел за истовар и складирање воена стока.
Овие руски тврдења за намената на погодените објекти не се независно потврдени.
Русија ја започна целосната инвазија врз Украина во февруари 2022 година, а војната трае повеќе од четири и пол години.
