Соединетите Американски Држави првпат употребија еднонасочни поморски нападни дронови во најновиот бран напади врз Иран, соопшти Американската централна команда (ЦЕНТКОМ).
Во операцијата поморските дронови биле употребени заедно со борбени авиони, воени бродови и еднонасочни воздушни нападни беспилотни летала. Станува збор за нова ескалација на конфликтот меѓу Вашингтон и Техеран, кој последните денови се интензивира поради нападите врз трговски бродови и безбедноста на пловидбата во Ормутскиот Теснец.
Од ЦЕНТКОМ соопштија дека американските сили се распоредени и подготвени да ја обезбедат слободата на пловидбата за трговските бродови.
„Силите се распоредени и подготвени да обезбедат слободата на пловидбата да остане загарантирана за комерцијалниот поморски сообраќај и покрај континуираната неоправдана иранска агресија, заплашувања, закани и произволни постапки“, соопшти Американската централна команда.
Американската страна соопшти дека претседателот Доналд Трамп ги наредил нападите со цел, како што наведуваат, „иранските сили да сносат одговорност“, како и да се намали нивната способност за напади врз трговски бродови.
Во меѓувреме, Иранската револуционерна гарда соопшти дека возвратила со напади врз американски воени бази во Бахреин и Кувајт, додавајќи дека одмаздничките операции продолжуваат.
Според „Скај њуз“, во Бахреин биле активирани сирени за предупредување од ракетен напад, додека противвоздушната одбрана во Јордан и Кувајт интервенирала против закани од воздух.
Тензиите меѓу САД и Иран повторно нагло се зголемија по серијата напади врз бродови и спорот околу безбедноста на пловидбата низ Ормутскиот теснец, една од најважните светски поморски рути за транспорт на енергенси.
