Рускиот стратешки бомбардер Ту-95 се урна денеска за време на тренажен лет во Амурската област на рускиот Далечен Исток. Во несреќата загинаа шест членови на екипажот, а еден е повреден, соопшти руското Министерство за одбрана.
Од Министерството наведоа дека авионот паднал во ненаселено подрачје и дека не превезувал муниција. Отворена е истрага, а на местото на несреќата е испратена истражна комисија на Воздушно-космичките сили.
Според првичните проценки, причина за падот е технички дефект.
Несреќата се случила во близина на селото Краснојарово, кратко по полетувањето од воздухопловната база Украинка, која е една од главните руски бази за стратешки авиони со долг дострел.
Ту-95 е дизајниран уште во Советскиот Сојуз и може да носи и нуклеарно оружје. Базата Украинка стана главно место за преостанатите руски стратешки бомбардери откако тие беа преместени од базите во европскиот дел на Русија.
