Уште еден логистички центар на руската компанија за онлајн трговија Wildberries се запали по напад во регионот на Екатеринбург, околу 1.400 километри источно од Москва. Станува збор за објекти кои во изминатите недели се честа цел на украински напади со беспилотни летала.
Компанијата соопшти дека пожарот е ставен под контрола и дека најголемиот дел од стоката во магацинот не е оштетен. Локалните руски власти информираа дека во текот на ноќта над регионот биле соборени осум дронови, од кои три паднале врз покривот на логистичкиот центар.
Украина од средината на јули ги засили нападите врз логистичките капацитети на Wildberries. Според достапните информации, од 18 јули досега биле нападнати најмалку 20 складишта на компанијата низ Русија.
Киев тврди дека Wildberries е дел од синџирот за снабдување на руската војска, додека Москва и компанијата ги отфрлаат овие обвинувања, наведувајќи дека станува збор за цивилни објекти. Од Wildberries нападите ги оценија како „терористички акти“.
Wildberries е најголемата платформа за интернет-трговија во Русија и често се споредува со „Амазон“ поради широката мрежа на логистички и дистрибутивни центри. Компанијата располага со околу 200 логистички објекти во Русија, а работи и во Белорусија, Казахстан, Киргистан, Ерменија, Узбекистан и Грузија.
Според податоците за 2024 година, Wildberries контролирал 47 проценти од рускиот пазар на онлајн платформи, пред конкурентот Ozon со удел од 35,5 проценти. Во 2025 година, компанијата остварила продажба во вредност од околу 6,1 билион рубљи, што претставува раст од 49 проценти во споредба со претходната година.
