(Видео) Серафимовски: Договорените услови за откуп на пиперката мора доследно да се почитуваат

Откупот на ајварската пиперка во Струмичко е во фокусот на дополнителни контроли, откако производителите се пожалиле дека на дел од откупните пунктови не се почитуваат договорените услови.

Министерот за земјоделство, шумарство и водостопанство Борче Серафимовски денеска во Струмица разговараше со производителите за текот на откупот, пласманот и примената на договорените цени и класификацијата.

— реклама —

На 13 август производителите, откупувачите и преработувачите се договориле првата класа да се откупува по 40 денари за килограм, прва-втора и индустриска класа по 30 денари, а шкартот по 15 денари.

Серафимовски порача дека договореното мора да се почитува, а најави и дополнителни проверки кај откупувачите и преработувачите. Од Државниот инспекторат за земјоделство велат дека досегашните контроли не покажале неправилности, но инспекторите продолжуваат да бидат на терен.

— реклама —

„Доколку договорот е нарушен, тоа за нас е сериозна работа. Повторно ќе ги преиспитаме состојбите во откупните центри и кај преработувачите“, рече Серафимовски.

— реклама —

Министерот нагласи дека државата не ја утврдува откупната цена бидејќи станува збор за пазарен однос, но она што е договорено меѓу страните мора доследно да се применува.

Најавена е и нова средба со Асоцијацијата на преработувачи и најголемите откупувачи во Струмичкиот регион, како и со преработувачите кои допрва треба да го започнат откупот во Прилепско.

Серафимовски најави дека по завршувањето на бербата ќе се работи и на подолгорочни решенија за да се избегне повторување на истите проблеми секоја година.