Силно невреме проследено со обилни врнежи и ветрови го погоди североисточниот дел на САД, предизвикувајќи поплави во крајбрежните подрачја, прекини во снабдувањето со електрична енергија и сериозни проблеми во воздушниот сообраќај.
Силниот ветер соборил далноводи, поради што во Њу Џерси речиси 28.000 корисници останале без струја. На Лонг Ајленд и во областа Рокавејс, во саботата навечер без електрична енергија биле речиси 13.000 корисници.
Комбинацијата од силните налети на ветерот и исклучително високата плима предизвикала поплави во крајбрежните делови на Њу Џерси и Њујорк. Под вода се нашле улици, автомобили и приземја на одделни објекти.
Во Еџвотер, Њу Џерси, реката Хадсон се излеала, по што службите за итни случаи евакуирале гости од хотел покрај брегот. Поплави биле пријавени и во населба во близина на аеродромот „Џон Ф. Кенеди“ во Њујорк.
Налетите на ветерот на одделни места надминале 80 километри на час, додека во Нантакет, Масачусетс, достигнале околу 100 километри на час.
Невремето предизвикало проблеми и во воздушниот сообраќај. На аеродромот „Логан“ во Бостон биле откажани повеќе од 250 летови, што претставува околу една четвртина од сообраќајот на аеродромот. Стотици летови на трите главни њујоршки аеродроми доцнеле.
Поради силата на невремето, неговото бавно движење и исклучително високата плима предизвикана од полната Месечина, останува висок ризикот од нови крајбрежни поплави.
Предупредувања за крајбрежни поплави се во сила за североисточен Њу Џерси, југоисточен Њујорк и крајбрежјето на Масачусетс, вклучително и Кејп Код и Нантакет.
Метеоролозите предупредуваат и на можност за поројни поплави поради обилните врнежи, особено во крајбрежниот дел на Масачусетс, делови од Роуд Ајленд и источен Лонг Ајленд.
Значителни врнежи се очекуваат и во областа на Њујорк.
Според метеоролозите, ова би можело да биде прва од серијата бури што во следните месеци би го погодиле источниот брег на САД по слична патека, под влијание на климатскиот феномен Ел Нињо.
