Израелскиот премиер Бенјамин Нетанјаху денеска изрази жалење за нападот врз болницата Насер во градот Кан Јунис, на југот на Појасот Газа, при што загинаа најмалку 20 лица, меѓу кои и пет новинари.
„Израел длабоко жали за трагичната несреќа што денеска се случи во болницата Насер во Газа. Израел го цени трудот на новинарите, медицинскиот персонал и сите цивили“, изјави Нетанјаху.
Нападот предизвика лавина реакции и осуди од меѓународната заедница. Американскиот претседател Доналд Трамп изјави дека „не е среќен поради тоа“ и нагласи дека е неопходно „да се прекине оваа ноќна мора“. Тој додаде дека не бил претходно информиран за израелската акција.
Францускиот претседател Емануел Макрон го оцени нападот како „недозволив“, а германското Министерство за надворешни работи соопшти дека е „шокирано од убиството на новинари, здравствени работници и цивили“, повикувајќи на итна и темелна истрага.
Генералниот секретар на Обединетите нации, Антонио Гутереш, остро го осуди нападот и побара брза и непристрасна истрага. Со осуда се приклучи и Светската здравствена организација, чиј генерален директор Тедрос Аданом Гебрејесус побара прекин на нападите врз здравствени установи и веднаш прогласување прекин на огнот.
Според извештаите, во нападот биле ранети најмалку 50 лица, меѓу кои и тешко болни пациенти кои примале здравствена нега во болницата. Израелските одбранбени сили (IDF) признаа дека го гаѓале подрачјето околу болницата, изразувајќи жалење за нанесената штета врз „невклучени лица“, но нагласија дека не ја таргетираат новинарската заедница.
Меѓу жртвите се пет новинари кои работеа за „Ројтерс“, „Асошиетед прес“, „Ал Џезира“ и други медиумски куќи. Овој напад повторно го отвори прашањето за безбедноста на цивилите и медиумските работници во воените зони, како и за почитувањето на меѓународното право и хуманитарните стандарди.
