(Видео) Спотот на студентите во Белград со Вучиќ предизвика бурни реакции, Брнабиќ побара реакција и од Европскиот парламент

Спотот што го објавија студентите од Факултетот за драмски уметности во Белград предизвика реакции во Србија, особено поради начинот на кој во него е претставен претседателот Александар Вучиќ. По објавувањето на видеото, претседателката на Собранието, Ана Брнабиќ, свика вонредна прес-конференција.

Видеото е направено како монтажа од снимки што Вучиќ претходно ги објавувал на својот профил на Инстаграм, комбинирани со пораки и снимки од граѓаните за време на протестите низ Србија.

— реклама —

Во еден дел е прикажана снимка на која Вучиќ им дели цвеќе на жени по повод 8 Март, по што следуваат пораки од граѓанки дека претседателот „не е добредојден“ и дека „народот не сака да го види“.

Во продолжението е искористена снимка од Вучиќ пред кого роботи играат оро, која е поврзана со претходна изјава на студентка дека ќе игра оро на денот кога ќе се пренесуваат апсења на претставници на власта.

— реклама —

Студентите во спотот ја искористиле и изјавата на Вучиќ дека ќе земе мало камионче и со него ќе тргне во кампања. Таа е проследена со снимки и пораки од протестите, меѓу кои „Вучиќ непожелен“, „никој не го сака“ и „persona non grata“.

— реклама —

Видеото завршува со сцени на бришење плочки и сапун оставен на подот. Токму овој дел предизвика остра реакција од власта.

Брнабиќ го оцени видеото како „монструозно“ и како „пресвртница во кампањата“. Таа побара реакција и од Европскиот парламент, обраќајќи им се на европските партнери и политичките групи во институцијата.

Претседателката на Собранието го поврза спотот со Студентската листа и со изборната кампања во Србија.