(Видео) Србија покажа вооружени роботски кучиња: Носат митралези, гранати и противоклопни ракети

Само две недели по отворањето фабрика за производство на роботи по кинески дизајн во Шабац, српската војска на големата воена вежба „Победник 2026“ прикажа вооружени четириножни роботи кои дејствуваат заедно со војниците.

Роботските кучиња беа прикажани на 13 септември на полигонот Пештер, откако српскиот претседател Александар Вучиќ на отворањето на фабриката на 29 август најави дека вооружени роботи по кинески дизајн ќе бидат ставени во служба на војската „во рок од 15 дена“.

На снимките од вежбата се гледа како четириножните роботи се движат по теренот, пукаат од автоматско оружје и влегуваат во објекти заедно со припадници на специјалните единици.

Вучиќ по вежбата изјави дека за првпат бил прикажан напад со роботизирани и беспилотни системи, при што роботските кучиња биле опремени со различни видови оружје.

Според него, на платформите биле поставени револверски фрлач на гранати, ракетни фрлачи „Зоља“ и митралез од 7,62 милиметри. Во извештаите за вежбата се наведува и употреба на противоклопни средства од типот „Оса“.

— реклама —

„Денеска за првпат можевте да видите напад на роботизирани, беспилотни и далечински управувани системи – практично како изгледа напад врз цела населба без ниту еден човек“, изјави Вучиќ по вежбата.

View this post on Instagram

Тој призна дека стабилизирањето на роботските кучиња за прецизно гаѓање било тешко, но рече дека српската војска успеала да интегрира повеќе видови оружје на платформите.

Роботите по изглед потсетуваат на моделот D1 Max Pro на кинеската компанија „AgiBot“, која е партнер во новата фабрика во Шабац. Сепак, засега не е јасно дали роботите употребени на воената вежба биле составени токму во Србија. Војската на Србија не одговорила на прашањето на Радио Слободна Европа за нивното место на производство.

— реклама —

Фабриката во Шабац има план за производство на околу 3.000 хуманоидни и четириножни роботи годишно, а соработката со кинеските компании отвори прашања и за можната воена примена на технологијата.

Иако вооружените четириножни роботи изгледаат како значителен технолошки исчекор, експертите предупредуваат дека нивната реална борбена ефикасност сè уште е ограничена.

Американскиот експерт за воена технологија Џаред Келер за Радио Слободна Европа оценува дека Србија најверојатно ќе се соочи со истите проблеми поради кои и други армии ја преиспитуваат употребата на роботски кучиња. Меѓу главните ограничувања ги посочува сигурноста и оперативниот дострел.

Искуствата од војната во Украина покажуваат дека четириножните роботи сè уште не се користат масовно на бојното поле. Украинската армија привлече големо внимание во 2024 година кога објави снимки од употреба на роботски кучиња, но оттогаш многу поголема примена добија копнените беспилотни платформи на тркала.

Една од причините е носивоста. Украинскиот копнен дрон „Spider“, на пример, тежи околу 50 килограми, но може да пренесува товар до 100 килограми. Напредните четириножни роботи со слична тежина вообичаено имаат значително помала носивост, иако Белград тврди дека неговите роботски кучиња можат да носат до 50 килограми.

— реклама —

Четириножните роботи се и механички посложени од платформите на тркала. Потребни им се повеќе мотори, комплексни сензори и значително количество енергија, што влијае врз траењето на батеријата, можноста за дефекти и цената.

Нивната цена може да достигне десетици илјади долари, додека на современото бојно поле би можеле да станат цел на многу поевтини FPV-дронови.

Претставник на украинската иницијатива „Brave1“ за Радио Слободна Европа оценил дека платформите на тркала можат да бидат подобар избор за одредени мисии поради поголемата носивост, издржливоста и можноста за дејствување на поголеми растојанија. Четириножните роботи, сепак, можат да имаат предност на тежок терен и при совладување физички пречки.

Претставувањето на роботските кучиња доаѓа во период кога Србија ја продлабочува воената и технолошката соработка со Кина. Според податоците што ги наведува Радио Слободна Европа, речиси 60 проценти од српскиот увоз на оружје во периодот од 2020 до 2024 година дошол од Кина.

— реклама —

Американскиот Стејт департмент, пак, го повика Белград при набавката на опрема и технологии за вештачка интелигенција да избира доверливи извори и добавувачи.

Келер оценува дека јавното претставување на вооружените четириножни роботи може да има и геополитичка и демонстративна функција, покрај нивната непосредна воена употреба.

На вежбата „Победник 2026“ учествуваа повеќе од 2.000 припадници на српската војска и над 500 единици воена техника. Покрај роботските кучиња, беа употребени тенкови, оклопни возила, борбени авиони, хеликоптери, артилериски и ракетни системи, како и повеќе видови беспилотни летала и копнени роботизирани платформи.