Поранешниот градоначалник на Општина Карпош и претседател на ГРОМ, Стевчо Јакимовски, преку објава на социјалните мрежи упати критики за состојбата во општината, оценувајќи дека Карпош е запуштен и недоволно одржуван.
Тој посочи дека на повеќе локации може да се забележат висока трева, искршена урбана опрема и исушени дрвја, додавајќи дека општината никогаш не изгледала полошо.
„Карпош никогаш не личел повеќе на запуштена нива отколку денес“, напиша Јакимовски.
Во својата објава тој иронично забележа дека со општината, според него, управуваат повеќе функционери и институции, но дека резултатите не се видливи на терен.
Јакимовски оцени дека наместо уредени паркови и редовно одржување, граѓаните се соочуваат со запуштени јавни површини и негрижа.
„Граѓаните не бараат чуда. Бараат ред, чистота и домаќинско работење“, порача тој, додавајќи дека токму тоа е она што недостасува во моментов во Карпош.
