Претседателот на СДММ, Трајче Стојчевски, на денешната прес-конференција обвини дека млади активисти на СДСМ биле физички нападнати во Ново Село додека мирно држеле транспарент поврзан со, како што наведе, состојбата со водата за пиење во Гостивар.
Стојчевски тврди дека зад нападот стојат лица поврзани со ВМРО-ДПМНЕ и побара Министерството за внатрешни работи и Јавното обвинителство итно да ги идентификуваат и приведат сите учесници, како и да утврдат кој го организирал нападот.
„Младите стоеја мирно и ја кажуваа вистината. Наместо одговори, добија физички напад. Ова не беше спонтан настан, туку организиран напад“, рече Стојчевски.
Тој оцени дека власта се обидува да ги замолчи младите кои јавно зборуваат за проблемите во државата, меѓу кои ги посочи состојбата со водата за пиење, економијата, иселувањето на младите и демографските трендови.
„Младите не се плашат и нема да молчат. Бараме институциите веднаш да постапат и сите одговорни да сносат последици“, порача Стојчевски.
Во своето обраќање, претседателот на СДММ нагласи дека, според него, младите ќе продолжат јавно да ги искажуваат своите ставови и покрај, како што рече, притисоците и заканите.
