Шумските пожари во јужна Франција доведоа до неочекувано откритие, откако во близина на селото Ле Порж беше пронајдено скриено складиште со околу 400 гранати и други експлозивни средства од Втората светска војна.
Според локалните власти, високите температури предизвикале детонација на муницијата, па додека пожарникарите се бореле со огнената стихија што уништи повеќе од 180 куќи, низ областа одекнувале силни експлозии.
Градоначалникот Марсијал Занинети изјави дека во текот на втората ноќ од пожарот биле регистрирани повеќе од 100 експлозии, а звукот го споредил со воена зона. Тој посочи дека никој не знаел дека на тоа место постоело закопано складиште со муниција.
„Проектилите летаа на сите страни, а еден дури проби низ куќа“, изјавил градоначалникот.
По акциите за расчистување и отстранување на опасните експлозивни средства, најголем дел од жителите се вратиле во своите домови, но некои делови од подрачјето и натаму остануваат затворени.
Според француските медиуми, меѓу пронајдената муниција имало германски и француски минофрлачки и противтенковски гранати од Втората светска војна.
Пожарот во регионот Жиронд, кој беснееше околу десет дена, сега е ставен под контрола. Во изминатите две недели шумските пожари зафатија повеќе европски земји, особено Франција и Шпанија, каде што беа евакуирани повеќе од 330.000 луѓе. Само во југозападна Франција изгореа околу 42.000 хектари, што го прави овој пожар еден од најголемите во земјата од Втората светска војна наваму.
