Илјадници граѓани повторно се собраа на улиците на Тирана, каде по 33. пат се одржа протест со барање за оставка на албанскиот премиер Еди Рама. Демонстрантите најпрво се собраа на плоштадот „Скендербег“, а потоа се упатија кон зградата на Владата, каде организаторите одржаа обраќања.
За разлика од судирите што претходно избувнаа пред албанскиот парламент, вечерниот протест помина главно мирно. Претходно во текот на денот, демонстрантите се обидоа да ги блокираат влезовите и излезите од Собранието и да го спречат заминувањето на службените возила по завршувањето на пленарната седница, по што дојде до судири со полицијата.
Еден од организаторите, Илјир Џемалај, ја обвини полицијата за прекумерна употреба на сила врз демонстрантите, но порача дека протестите ќе продолжат на мирен начин.
„Се соочивме со полициско насилство, но нема да возвратиме со насилство. Ќе продолжиме со мирната борба сè додека овој режим не замине“, изјави Џемалај.
Според Министерството за здравство на Албанија, медицинска помош побарале 16 лица, меѓу кои 14 полицајци и двајца демонстранти. Четворица полицајци биле задржани на лекување, додека останатите повредени биле пуштени по укажаната помош.
Полицијата за време на интервенцијата употребила солзавец, бибер-спреј и водени топови за да ги растера насобраните, додека властите тврдат дека демонстрантите фрлале камења, јајца и други предмети кон полициските службеници.
Протестите, кои организаторите ги нарекуваат „Фламинго револуција“, траат со недели и се насочени против планираниот повеќемилијарден туристички проект во близина на заштитен природен резерват, познат по колониите на фламинга. Демонстрантите тврдат дека проектот е пример за системска корупција и бараат покренување постапки против одговорните.
Во меѓувреме, албанското Специјално обвинителство за борба против корупцијата отвори истрага и издаде налози за апсење на повеќе од десет бизнисмени под сомнение за перење пари и трговија со дрога. Под истрага се најде и продажбата на земјиште во близина на заштитеното подрачје на компанија поврзана со инвестицискиот проект на Џаред Кушнер и Иванка Трамп, а исплати во вредност од 128 милиони евра се блокирани додека трае истрагата.
