(Видео) Торнадо ја погоди Сицилија, двајца тешко повредени, превртени автомобили и оштетени згради

Ретко и силно торнадо ја погоди западната страна на Сицилија, предизвикувајќи значителна материјална штета во градовите Марсала, Петросино и Мазара дел Вало. Две лица се тешко повредени откако торнадото го зафатило нивниот автомобил во близина на Петросино и го исфрлило од патот.

Невремето започнало со две водени вртложни појави над морето, во близина на пристаништето во Марсала, по што торнадото се придвижило кон копното.

— реклама —

Во населбата Теренове во Марсала сериозно е оштетено училиштето „Алчиде де Гаспери“. На објавените снимки се гледаат искршени прозорци и делумно урнат таван. Во други делови од градот се превртени автомобили и камиони, а на земјата паднале и столбови од далноводите. Уништена е и една куќа.

— реклама —

Надлежните служби се на терен и работат на отстранување на последиците од невремето.

Раководителот на Цивилната заштита на Сицилија, Салваторе Кочина, изјави дека станува збор за невообичаено силна појава.

— реклама —

„Беше речиси како американско торнадо. Никој не памети нешто со ваква сила“, изјави Кочина.

Тој посочи дека Цивилната заштита уште на почетокот на септември предупредила на можноста за екстремни временски појави во текот на есента. Како една од причините за нестабилноста ја навел топлината насобрана во морето по исклучително топлото лето.

Кочина додаде дека настанот повторно укажува на проблемот со екстремните временски појави, кои, според него, стануваат карактеристични во последните години поради климатската криза.

Претседателот на регионот Сицилија, Ренато Скифани, најави доделување посебни средства за итни случаи. Предупредувањето за опасни временски услови останува во сила и за утре, бидејќи се очекува продолжување на дождот и невремето.