Бројот на жртвите во големиот шумски пожар кај хрватскиот град Омиш се зголеми на едно лице, додека повеќе од 40 луѓе се повредени. Телото било пронајдено при прегледот на опожареното подрачје, но неговиот идентитет засега не е потврден.
Седуммина од повредените се во животна опасност и се приклучени на респиратори, изјави хрватската министерка за здравство, Ирена Хрстиќ. Четворица од нив се префрлени на лекување во Загреб, меѓу кои и 17-годишна девојка.
Пожарот избувнал кај местото Локва Рогозница, по што се проширил кон Омиш и го зафатил подрачјето над градот. Во огнот изгореле бројни објекти, возила и пловила, а властите проценуваат дека е причинета огромна материјална штета.
Поради пожарот биле евакуирани околу 1.200 жители и туристи. Речиси 200 луѓе во текот на ноќта биле спасени од морето, откако се засолниле таму, бегајќи од огнената стихија.
Хрватскиот претседател Зоран Милановиќ оцени дека станува збор за „ужасен настан“, додавајќи дека пожарот можеби не настанал само по природен пат и со тоа отвори сомнежи дека можеби бил подметнат.
Иако утрово властите соопштија дека состојбата е смирена и пожарот е ставен под контрола, во попладневните часови огнот повторно се разгорел. Дополнителна загриженост предизвикува и засилувањето на ветерот, поради што постои опасност пожарот повторно да се прошири.
