Американскиот претседател Доналд Трамп предупреди дека комунизмот, според него, сè повеќе се шири и во Соединетите Американски Држави, оценувајќи дека неговите политички противници претставуваат поголема закана за земјата отколку некои од најтешките историски настани.
„Комунизмот лесно се продава. Ако сакав да бидам комунист, ќе бев најголемиот комунист досега. Ќе бев рамен со Ленин“, изјави Трамп, додавајќи дека комунистичките идеи се темелат на ветувања за бесплатни станови и имот, но, според него, завршуваат со сиромаштија и насилство.
Тој оцени дека комунизмот никогаш не успеал и никогаш нема да успее.
„Она што функционира се Соединетите Американски Држави. Денес имаме повеќе работни места од кога било, а работниците заработуваат повеќе од кога било. Тоа е најдобриот систем“, рече американскиот претседател.
Трамп смета дека токму поради ваквите ставови ужива голема поддршка меѓу Латиноамериканците.
„Многумина од нив доаѓаат од земји кои биле комунистички или радикално социјалистички. Тие знаат што значи тоа“, истакна тој.
Осврнувајќи се на домашната политика, Трамп ги нарече своите политички противници „многу опасни“.
„Еднаш реков дека поради сето ова земјата е во поголема опасност отколку за време на Првата и Втората светска војна, Перл Харбор или нападите на 11 септември. Подоцна многумина ми рекоа дека веројатно сум бил во право“, изјави тој.
Во интервјуто Трамп зборуваше и за промената на неговиот став кон иранското раководство. На потсетувањето дека пред еден месец иранските лидери ги нарекуваше „рационални и паметни“, а сега ги опишува како „лоши“ и „болни луѓе“, тој одговори дека мислењето му се сменило откако подобро ги запознал.
„Кога реков дека се рационални, мислев на тогашното раководство. Првиот ешалон веќе не постои. Вториот исто така. Сега разговараме со третиот ешалон и мислам дека тие се порационални“, рече Трамп.
