(Видео) Трамп за неколку часа го смени ставот: Од „ужасен партнер“ до пофалби за Шпанија

Американскиот претседател Доналд Трамп за само неколку часа целосно го промени тонот кон Шпанија. Откако ја нарече „ужасен партнер“ во НАТО и побара прекин на трговските односи, подоцна изјави дека земјата „целосно се искупила“.

Трамп првично ја критикуваше Шпанија поради, како што наведе, недоволното зголемување на воените трошоци и одбивањето да ги стави на располагање заедничките воени бази за операции поврзани со конфликтот со Иран.

— реклама —

„Не сакам повеќе да работиме со Шпанија. Таа е ужасен партнер во НАТО“, изјави Трамп по самитот на Алијансата.

Сепак, само неколку часа подоцна, за време на летот кон Вашингтон, американскиот претседател го ублажи ставот.

— реклама —

„Имав проблеми со Шпанија и сè уште ги имам, но денес таа целосно се искупи. Беше многу дарежлива и прифати едно значајно финансиско барање“, рече Трамп, без да открие на што точно се однесува.

Според американски медиуми, администрацијата во Вашингтон во меѓувреме подготвува список на шпански производи кои би можеле да бидат предмет на евентуални трговски ограничувања, доколку претседателот одлучи да воведе мерки против Мадрид.

— реклама —

Шпанскиот премиер Педро Санчез ги минимизираше изјавите на Трамп, оценувајќи дека нивната средба поминала во пријателска атмосфера и дека разговарале дури и за фудбал и Светското првенство.

Позадината на спорот е одбивањето на Шпанија да ги зголеми трошоците за одбрана на пет проценти од БДП, како и критиките на Мадрид за американските и израелските напади врз Иран.

— реклама —

И покрај заканите, аналитичарите оценуваат дека евентуални санкции против Шпанија би биле тешко изводливи, бидејќи трговските односи со земјите членки на Европската Унија се регулирани преку заедничката европска трговска политика.