Јасна Марковска, мајка на загинатиот Матеј во трагедијата во дискотеката „Пулс“, објави емотивна порака по матурската манифестација во Пробиштип, каде што другарите и градот им оддадоа почит на Матеј и Никола, кои вечерва требаше да бидат матуранти.
„Пробиштип уште еднаш покажа чест и почит кон нашите ангели Матеј и Никола кои вечерва требаше да бидат матуранти. Верувам дека ќе бидат ангели чувари на ова наше градче кое не ги заборави ни за миг и особено на матурантите кои вечерва ќе слават и за нив“, напиша Марковска.
Таа сподели снимка од матурската манифестација на која, пред присутните, беа прикажани фотографии од двајцата млади, додека во позадина се слушаше потресна порака.
„Не постои магија со која би се променило тоа болно минато, кое создава тага што душата ја откорнува. Не постои прегратка која ќе ги избрише солзите на една мајка, на еден татко, на баба или дедо, на другар, пријател, или на цел народ кој тагува до небесата и назад“, се вели во нарацијата.
Во пораката се додава и:
„Не постои човек кој ќе создаде мевљан за таа рана, која немилосрдно боли, пресекува повеќе и од најострата сабља, бидејќи пресекува онаму каде сабљата не може.“
На екранот за време на манифестацијата стоела и пораката:
„Нека ви е светол патот ангели наши, вашата генерација никогаш нема да ве заборави.“
