Три лица го загубија животот, а две се повредени во пад на новинарски хеликоптер во предградие на Лос Анџелес. Несреќата се случила додека екипата известувала од местото на друга тешка сообраќајна несреќа во областа Чатсворт.
Хеликоптерот бил во сопственост на телевизијата NBC Los Angeles, а работел и за Telemundo 52. Тој бил меѓу неколкуте новинарски летала што известувале за сообраќајната несреќа.
Според противпожарната служба на Лос Анџелес, леталото се урнало меѓу две комерцијални згради, по што избувнал пожар во кој биле зафатени четири возила и два контејнери за складирање. На местото биле испратени повеќе од 70 пожарникари.
Полицијата засега не соопштила колку лица се наоѓале во хеликоптерот во моментот на несреќата ниту го објавила идентитетот на загинатите.
Падот ќе го истражува Националниот одбор за безбедност во сообраќајот (NTSB).
Несреќата била потврдена и во текот на телевизиското известување во живо. Водителката на вестите Колин Вилијамс изјавила дека редакцијата го изгубила контактот со екипата на терен.
„Знаевме дека сме го изгубиле контактот со нашите луѓе таму и штотуку добивме потврда“, рекла таа.
Градоначалничката на Лос Анџелес, Карен Бас, на Икс напишала дека е „апсолутно скршена“ поради загубата на животи во Чатсворт.
Гувернерот на Калифорнија, Гевин Њусом, изразил сочувство до жртвите и нивните семејства, како и до семејството на NBC4.
