Медицински хеликоптер се урна во близина на островот Каталина кај Лос Анџелес, при што загинаа две лица, две биле пренесени во болница, а по уште едно лице се трага.
Џонатан Торес од противпожарната служба на округот Лос Анџелес ја потврдил смртта на две лица и транспортот на две повредени лица во локалните болници. Според надзорничката на округот, Џенис Хан, хеликоптерот паднал кратко по полетувањето од островот.
Властите ја добиле пријавата за несреќата нешто пред 20 часот, по што на местото биле испратени итните служби и американската крајбрежна стража.
Остатоците од леталото биле лоцирани на длабочина од околу 73 метри во близина на островот Каталина, кој се наоѓа на околу 35 километри од брегот на округот Лос Анџелес.
Засега не е позната здравствената состојба на едно од хоспитализираните лица. Се претпоставува дека хеликоптерот бил во сопственост на компанијата REACH Air Medical Services од Сакраменто.
