Речиси два месеци по големиот пожар во магацин во населбата Бојл Хајтс во Лос Анџелес, жителите и локалните бизниси сè уште се соочуваат со неподнослива смрдеа, огромен број муви и појава на стаорци.
Пожарот што избувна на 17 јуни уништи голем ладен магацин, по што во објектот останале околу 39 милиони килограми храна која почнала да се распаѓа. Станува збор за говедско и свинско месо, живина и морски плодови.
Последиците особено ги чувствуваат локалните жители и малите бизниси. Алексис Сикаирос, кој со својата девојка има штанд за кафе во близина, вели дека местото порано било полно со купувачи, но дека сега многумина го избегнуваат поради неподносливата миризба.
„Смрдеата е ужасна, навистина неподнослива“, вели 37-годишната Меша, која работи како обезбедување во продавница во близина. Таа мирисот го споредува со мирис на распаднато тело.
Сикаирос вели дека неговиот штанд бил затворен две недели по пожарот, а откако повторно отворил, бројот на купувачи значително се намалил. Дополнителен проблем се и ројот муви што се појавил во областа поради храната што се распаѓа.
Во инспекциски извештај нарачан од градските власти се предупредува дека отпадот и високите температури во магацинот можат да го забрзаат размножувањето на мувите, кои можат да претставуваат ризик за луѓето и животните, особено доколку имаат отворени рани.
Жителите велат дека забележуваат и големи стаорци, а се жалат дека поставените стапици не се доволно големи за нив.
Локалното население во меѓувреме ја критикува реакцијата на градските власти, барајќи поголема транспарентност и побрзо справување со последиците.
Градоначалничката на Лос Анџелес, Карен Бас, изјави дека ги разбира фрустрациите на жителите и дека градските служби работат со локални, државни и федерални институции, како и со непрофитни организации, за да се обезбеди помош.
Градот презел мерки за забрзување на расчистувањето, а во населбата биле поставени и мобилни здравствени клиники и поделени илјадници прочистувачи на воздух.
Компанијата „Lineage“, која управувала со магацинот, кон крајот на минатиот месец била казнета со 500 долари дневно поради нехигиенски услови и нарушување на јавниот ред. Бас ѝ поставила рок до 13 август да го заврши расчистувањето.
Од компанијата соопштија дека досега се отстранети околу 80 отсто од отпадот, во споредба со 60 отсто на 31 јули. Се очекува целата операција за расчистување да чини меѓу 80 и 100 милиони долари.
„Lineage“ наведува дека екипите работат непрекинато на отстранување на отпадот, расчистување на остатоците и демонтирање на оштетените делови од објектот.
Компанијата признава дека станува збор за исклучително сложена операција и посочува дека намалувањето на непријатната миризба е еден од главните приоритети во процесот на санација.
