Дебатата дали делата создадени со вештачка интелигенција можат да се сметаат за вистинска уметност доби ново поглавје, откако Гугл во Лос Анџелес го отвори „Даталенд“ – првиот музеј за уметност создадена со вештачка интелигенција во светот.
Музејот, кој ги отвори вратите на 20 јуни, се наоѓа во комплексот „Гранд ЛА“, проектиран од познатиот архитект Френк Гери, и се простира на повеќе од 2.300 квадратни метри. Проектот е реализиран во соработка со медиумскиот уметник Рефик Анадол, долгогодишен партнер на Гугл во областа на дигиталната уметност.
Првата изложба, насловена „Машински соништа: Дождовна шума“, користи модел на вештачка интелигенција, обучен врз огромна база на податоци од природниот свет. Системот во реално време создава визуелни содржини со резолуција од 1,2 милијарди пиксели и постојано се приспособува на присутните посетители.
Освен визуелните ефекти, изложбата создава и звучни амбиенти, препознава емоции во реално време и емитува алгоритамски генерирани мириси, нудејќи целосно интерактивно искуство.
Од компанијата посочуваат дека музејот работи со моделите „Џемини“, сместени во инфраструктурата на „Гугл клауд“, при што целата содржина се генерира во центри за обработка на податоци и директно се пренесува во изложбениот простор.
Паралелно со отворањето на музејот, платформата „Гугл Артс енд Калчр“ започна и програма за поддршка на уметници кои работат со вештачка интелигенција. Четворица автори ќе добијат грантови од по 25.000 долари, менторска поддршка од студиото на Рефик Анадол и пристап до алатки за машинско учење. Нивните дела ќе бидат претставени во „Даталенд“ и на интернет-платформата на Гугл подоцна годинава.
Отворањето на музејот веќе предизвикува бројни реакции во уметничките кругови, а прашањето дали вештачката интелигенција може да биде вистински творец на уметност останува една од најжешките теми во современата културна сцена.
