(Видео) Турската полиција со солзавец упадна во седиштето на Републиканската народна партија

Турската интервентна полиција денеска употреби солзавец и упадна во седиштето на главната опозициска Републиканска народна партија во Анкара, за да го исфрли сменетото раководство на партијата, продлабочувајќи ја политичката криза во Турција.

Според извештаите, облаци солзавец се ширеле низ зградата, додека присутните внатре извикувале пароли и фрлале предмети кон влезот, обидувајќи се да ја спречат полицијата да ја пробие импровизираната барикада. Засега нема информации за повредени.

— реклама —

До инцидентот доаѓа откако турски суд во четвртокот го разреши лидерот на Републиканската народна партија, Озгур Озел, и ги поништи резултатите од партискиот конгрес на кој беше избран во 2023 година, повикувајќи се на наводни нерегуларности.

— реклама —

На негово место повторно беше вратен поранешниот лидер на партијата, Кемал Киличдароглу, кој истата година загуби од претседателот Реџеп Таип Ердоган на претседателските избори.

— реклама —

Гувернерот на Анкара нареди евакуација на лицата кои се наоѓале во седиштето на партијата, по што интервентната полиција интервенираше.

„Нападнати сме“, порача Озгур Озел во видеообраќање објавено на платформата Икс, додека безбедносните сили влегуваа во објектот.

— реклама —

Тој потоа ги повика поддржувачите на протести и заедно со стотици симпатизери се упати кон турскиот парламент, придружуван од голем број полицајци.

Сменетото раководство на Републиканската народна партија најави нови протести во Истанбул.