Украинската морнарица соопшти дека нејзините сили го погодиле рускиот крајбрежен ракетен систем „Бастион“ на окупираниот Крим. Според украинските власти, во нападот биле погодени лансирните позиции и просторот каде што бил распореден системот, при што биле предизвикани значителни загуби во жива сила и опрема. Точната процена на штетата сè уште се утврдува.
„Бастион“ е релативно редок и скап систем за крајбрежна одбрана, кој Русија го користи за лансирање на надзвучни крстосувачки ракети „Оникс“, како и хиперсонични ракети „Циркон“. Овие ракети се користат за напади врз цели во јужните делови на Украина и пошироко.
Украинскиот Генералштаб соопшти и дека бил погоден железнички мост кај Свитлодолинск во делумно окупираната Запорошка област. Според Киев, руските сили го користат мостот за логистика и транспорт на војници.
Украина известила и за напади врз руски логистички центри и складишта со муниција во окупирана Карливка, во Доњецката област.
Крим, кој Русија го анектираше во 2014 година, претставува важна база за руските воени операции. Украинските сили во последниот период ги засилуваат нападите врз руски воени цели на полуостровот, со цел да ја ослабат противвоздушната одбрана, поморските капацитети и логистичките линии на руските сили.
