Украинските сили во текот на ноќта извршиле серија напади врз голема руска рафинерија, нафтни терминали и други воени цели, соопшти Генералштабот на вооружените сили на Украина.
Според украинската војска, цел на нападите биле рафинеријата „Илски“ во Краснодарскиот крај, нафтниот терминал „Курганнефтепродукт“ во Таганрог, складиштето „Азовнефтепродукт“ во Азов и комплексот за преработка на нафта „НОВАТЕК-Уст-Луга“ во Ленинградската област.
Во соопштението се наведува и дека биле погодени 18 руски пловни објекти, меѓу кои 13 танкери, три товарни брода, еден траект и едно помошно пловило.
На социјалните мрежи се појавија снимки од голем пожар во рафинеријата „Илски“, а украинскиот Генералштаб потврди дека по нападот биле регистрирани експлозии и пожар. Засега не е познат обемот на предизвиканата штета.
Пожари биле пријавени и во Таганрог и во Азов, каде што, според извештаите, биле погодени нафтни терминали и складишта за гориво.
Рафинеријата „Илски“, која се наоѓа на околу 500 километри од украинската територија, е една од најголемите во јужна Русија, со годишен капацитет од речиси 6,6 милиони тони гориво. Ова е најмалку 17-тиот украински напад врз овој објект.
Украинските сили, исто така, соопштија дека погодиле складиште за гориво и мазива во близина на Розивка, на окупираниот дел од Запорошката област.
Киев наведува дека енергетските постројки претставуваат легитимни воени цели, бидејќи обезбедуваат гориво и финансиски средства за руските воени операции. Во меѓувреме, руската влада неодамна го забрани извозот на дизел гориво до крајот на месецот поради проблемите со снабдувањето предизвикани од честите украински напади.
