Една од најголемите руски рафинерии за нафта ја запре преработката на сурова нафта откако беше погодена во напад со украински дрон, тврдат два извора од нафтената индустрија.
Во нападот врз руската област Нижни Новгород загина едно лице, а оштетен е индустриски објект, соопшти гувернерот на регионот, Глеб Никитин. Во оваа област се наоѓа рафинеријата НОРСИ, која е четврта по големина во Русија и втор најголем производител на бензин во земјата.
Според изворите, во нападот е оштетена клучната примарна единица за преработка на сурова нафта, која има дневен капацитет од околу 190.000 барели и претставува повеќе од половина од вкупниот капацитет на рафинеријата.
Компанијата „Лукоил“, која е сопственик на рафинеријата, засега не се огласи по повод нападот.
Рафинеријата НОРСИ има капацитет да преработува повеќе од 15 милиони метрички тони сурова нафта годишно, што е приближно 320.000 барели дневно.
