Најмалку 12 лица загинале, а 39 се повредени во напад со украински беспилотни летала врз индустриски и цивилни цели во Нижнекамск, во руската република Татарстан, соопшти градоначалникот Радмир Белјаев.
Во нападот била погодена и рафинеријата „ТАНЕКО“, една од технолошки најнапредните рафинерии во Русија. Руските медиуми објавија дека објектот бил цел на нападот, а на снимки што се појавија на социјалните мрежи се гледа чад над објектот што личи на рафинеријата. Автентичноста на снимките засега не е независно потврдена.
Станува збор за рафинерија во сопственост на руската компанија „Татнефт“, која и претходно била цел на украински напади, вклучително и во почетокот на јуни.
Податоците покажуваат дека рафинеријата во 2024 година преработила околу 17 милиони тони сурова нафта. Во истиот период произвела околу 2,7 милиони тони бензин и 8,5 милиони тони дизел-гориво.
По нападот, лидерот на Татарстан, Рустам Миниханов, прогласил денови на жалост, соопшти градоначалникот на Нижнекамск.
Украина во последните месеци ги засили нападите врз руските нафтени рафинерии и други објекти поврзани со енергетскиот сектор. Дел од овие напади придонесоа за проблеми со снабдувањето со гориво во повеќе региони во Русија, иако руските власти тврдат дека најголемиот дел од првичните проблеми биле надминати.
