Украинската војска наводно во текот на ноќта извршила серија напади со беспилотни летала врз повеќе руски региони, при што биле погодени петрохемиски постројки од стратешко значење, јавуваат руски канали на Телеграм.
Според локални извештаи, дронови го погодиле петрохемиското претпријатие „Толијатикаучук“ во Самарската област, по што избувнал пожар. На социјалните мрежи се појавија фотографии и видеа на кои, наводно, се гледаат беспилотни летала над градот Толјати непосредно пред нападот.
Набргу потоа, голем пожар бил забележан и во фабриката за синтетичка гума „Нижнекамскнефтехим“ во градот Нижнекамск, во Република Татарстан. Над градот се издигнал густ црн чад.
Постројката во Нижнекамск се наоѓа на повеќе од 1.200 километри од најблиската точка до украинската граница и важи за една од најголемите петрохемиски компании во Источна Европа. И претходно била мета на наводни украински напади.
„The Kyiv Independent“ наведува дека не можел независно да ги потврди овие информации, додека украинските власти засега не се огласиле во врска со наводните напади. Во моментов нема официјални податоци за евентуалната штета.
Во последниот период Украина сè почесто користи беспилотни летала од домашно производство за напади врз цели длабоко на руска територија, особено објекти поврзани со нафтената индустрија, логистиката и одбранбениот сектор.
Овие наводни напади следуваат само неколку дена откако рускиот претседател Владимир Путин го отфрли повикот на украинскиот претседател Володимир Зеленски за итно обновување на мировните преговори.
